На редовната средба со претставниците на локалните и републичките печатени и електронски медиуми градоначалникот Драги Делев ја најави реализацијата на неколку проекти, кои значително ќе придонесат за заштита на животната средина, како и за подобрување на условите за живот на инвалидизираните лица.
Градоначалникот Делев информираше дека започна реализацијата на пилот проектот со кој е предвидено поставување на канти за селектиран отпад. Односно за собирање на хартија, пластика и друг отпад во посебни канти. Кантите ќе бидат поставени на осум локации во градот, пред поголемите станбени блокови со цел граѓаните да се привикнуваат за селектрирање на отпадот. За целосна реализација на проектот ќе бидат набавени посебни машини за рециклирање.
Во меѓувреме, одредени фирми за преработка на пластика и хартија, во договор со ЈПКД Комуналец ќе вршат рециклирање на отпадот. Пилот проектот ќе биде проследен со посебна јавна кампања заради подготовка на граѓаните за селектирање на отпадот од домаќинствата и работните простори.
Делев информираше и за новиот сообраќаен режим, односно спроведувањето на Одлуката на Советот на општина Гевгелија за измена на сообраќајниот режим на одделни улици во Гевгелија. Според оваа одлука сообраќајот на улицата "Маршал Тито", од крстосницата со улицата "Мирче Ацев"(стар Пионерски дом) до железничката станица ќе се одвива во две насоки.
Исто така, во две насоки ќе се одвива и сообраќајот на улицата "Кирил и Методиј", која минува крај црквата Св.Кирил и Методиј. На оваа улица двонасочно сообраќајот ќе се одвива од крстосницата со улицата "Васо Карајанов" до крстосницата со улицата "Ристо Фаршинин". На оваа крстосница, односно пред црквата Св.Кирил и Методиј, уреден е кружен тек на движење на сообраќајот заради непречено одвивање на сообраќајот.
Покрај тоа, сообраќајот на улицата "Мицо Шаренков", крај заградата на УЈП-Гевгелија, ќе се одвива во една насока, односно во насока кон улицата "7 Ноември". На овој начин ќе се обезбеди разредување и пофункционално одвивање на сообраќајот во централното градско подрачје. Ве известуваме дека Центарот за поддршка на НВО – Гевгелија во партнерство со општина Гевгелија го реализира проектот „Еднаков пристап за сите“, финансиран од Фондација Институт Отворено Општество – Македонија (ФИОО-М) и општина Гевгелија.
Целта на проектот е подобрување на животот на лицата со телесен хендикеп и нивно активно учество во јавниот живот. Тоа ќе го оствариме преку инсталирање на пристапни рампи во објектите на јавните установи, подигање на јавната свест за еднаквост за сите, преку организирање кампања, логистичка поддршка и едуцирање на здруженијата на лица со посебни потреби. Една од активностите во проектот е изградба на пристапни рампи во објектите на јавните установи во општина Гевгелија. Вкупниот буџет за изградба и поставување на пристапни рампи во објектите на јавните установи изнесува 300.000 мкд. Изведувач на градежните зафати е фирмата „Стил Фантази“ Д.О.О. од Гевгелија.
Пристапни рампи во рок од десет дена ќе бидат поставени на следните објекти: Општина Гевгелија,Основен суд Гевгелија, Агенција за вработување, Фонд за здравствено осигурување, Пионерски дом, Даночно одделение-Гевгелија, СОУ „Јосиф Јосифовски“, ОУ „Владо Кантарџиев“ и Центар за поддршка на НВО (зграда на старо забавиште).

Покрај редовното одржување на уличната мрежа од јавното осветлување, како во Гевгелија, така и во сите други населени места во општината, постојано се врши и обновување и проширување на уличната мрежа.
Во изминатиот период од годината, согласно Програмата, извршено е поставување нова улична инсталација во новата станбена населба "Касарна"и извршено е целосно нејзино осветлување. Исто така, на краците на улица "Гоце Делчев" извршено е поставување на нови канделабри. Активностите за проширување на уличната мрежа продолжуваат, како и редовното следење на состојбата со уличното осветлување и навремено отстранување на констатираните дефекти.

На предвремените парламентарни избори во општина Гевгелија, кои се одржаа на 1 јуни 2008 година, од вкупно 19.621 избирачи на гласање излегле 15.010 граѓани. Од вкупниот број гласачки ливчиња 402 биле неважечки. Според официјалните резултати на Општинската изборна комисија Коалицијата за подобра Македонија, предводена од ВМРО-ДПМНЕ освоила 8237 гласови, додека Коалицијата-Сонце, предводена од СДСМ 5895 гласови.

Претставници на ЗЕЛС и на проектот за избор на најдобри практики во единиците на локалната самоуправа во РМ престојуваа во општина Гевгелија и информираа дека Одборот за селекција, согласно планот за спроведување на програмата и изготвените критериуми, ја избра општина Гевгелија меѓу 12- те општини, кои аплицирале со најдобри практики. Општина Гевгелија аплицираше со проектот "Истурени канцеларии за комуникација - вистински сервис на граѓаните". Од потесната листа ќе бидат избрани 6, кои ќе бидат прогласени за најдобри практики на годинашниот избор.

Сообраќајот на улицата "Маршал Тито", од крстосницата со улицата "Мирче Ацев"(стар Пионерски дом) до железничката станица, како и на неколку други сообраќајници, во иднина ќе се одвива во две насоки. Со оваа промена всушност започнува примената на Одлуката на Советот на општината за измена на сообраќајниот режим. Со оваа одлука се предвидени измени во сообраќајниот режим заради пофункционално одвивање на сообраќајот. Исто така, во две насоки ќе се одвива и сообраќајот на улицата "Кирил и Методиј", која минува крај црквата Св.Кирил и Методиј. И тоа, двонасочно сообраќајот ќе се одвива од крстосницата со улицата "Васо Карајанов" до крстосницата со улицата "Ристо Фаршинин". На оваа крстосница, односно пред црквата Св.Кирил и Методиј, ќе биде уреден кружен тек на движење на сообраќајот. Покрај тоа, во иднина сообраќајот на улицата "Мицо Шаренков", крај заградата на УЈП-Гевгелија, ќе се одвива во една насока, односно во насока кон улицата "7 Ноември". На овој начин ќе се обезбеди разредување и пофункционално одвивање на сообраќајот во централното градско подрачје. Истовремено, сообраќајно заживување на одделни сообраќајници и делови од градот. Во функција на изменетиот сообраќаен режим градоначалникот на општина Гевгелија Драги Делев одржа состанок со претставници на СВР-Гевгелија и на сообраќајната инспекција. Притоа, е договорено по стапувањето во сила на одлуката и поставувањето на потребната хоризонтална и вертикална сигнализација да започне одвивањето на сообраќајот по новиот режим. Истовремено, е укажано на потребата од позасилена сообраќајна контрола, пред се, на паркирањето на возила на недозволени места и сообраќајници, бидејќи со ваквото однесување на одделни возачи се загрозува целокупниот сообраќај.