СЕДНИЦА НА СОВЕТОТ НА ОПШТИНАТА

Советот на општина Гевгелија на 27 јуни 2008 година ја одржа 53. седница на која разгледа повеќе предлог одлуки. Советниците донесоа Нацрт-одлука за донесување на Деталниот урбанистички план за дел од Блок 4 урбана единица А во градот Гевгелија за 2007-2012 година.
Советот на општината расправаше за невремето што ги зафати Миравци и Давидово и причинитетите штети, при што од страна на градоначалникот на општината беше информиран за досега превземените активности за пријавување и проценка на штетите. Притоа, беше заклучено Елаборатот за проценка на штетите од страна на Општинската комисија за проценка на штетите од елементарни непогоди да биде што поскоро изработен.
Советот донесе Одлуката за измена и дополнување на Буџетот на општина Гевгелија со која, покрај другото, се обезбедуваат финансиски извори за финансирање на дел од активностите за Светското женско јуниорско првенство во ракомет, чиј покровител е општина Гевгелија, а кое од 21 до 24 јули годинава ќе се одржи во Гевгелија. Исто така, советниците донесоа и одлука за формирање на Комисија за предлагање на листа на имиња на улици, плоштади, мостови и на други инфраструктурни објекти во општината.
На дневен ред на седницата на Советот на општината, по трет пат, се најде Предлог-одлуката за организацијата, делокругот и начинот на извршување на задачите на општинската администрација на општина Гевгелија. Бидејќи како што објасни градоначалникот на општината, со Уредба на Владата на РМ општината е обврзана да формира одделение за човечки ресурси, поради што и неопходни се измени во досегашниот текст на одлуката. Но, споменатата одлука и овој пат не беше прифатена од мнозинството советници без никакво објаснување.

ВОДОСНАБДУВАЊЕ

На почетокот од летото, кога општина Гевгелија ја зафатија тропски горештини, а потрошувачката на вода за пиење е сначително зголемена, се реализираа неколку проекти за подобрено водоснабдување на населените места.
Жителите на Моин летово ќе имаат двојно повеќе количества вода за пиење, по изградбата на новиот водовод, што го изведе компанијата "Алфа проект". Изведбените работи завршија, во тек е поврзувањето на новиот бунар со старата каптажа, по што и водоснабдувањето во ова населено место ќе биде значително подобрено.
Во Петрово привршуваат работите околу изградбата на новиот водовод, по што жителите во ова населено место, уште летово ќе пијат квалитетна вода,а ќе ја имаат во доволни количества. Реализацијата на проектот чини 3.000.000 денари, а изведувач на работите беше компанијата "Гема пласт", која на објавениот тендер имаше најповолна понуда.
Заради разрешување на проблемите со водоснабдување во Смоквица, во тек е изработка на проект, по што ќе биде поведена постапка за негова реализација и изградба на нов бунар за обезбедување на нови дополнителни количества вода за пиење за смоквичани, кои летово честопати остануваат беа вода за пиење.

СМРДЛИВА ВОДА

Во пресрет на главната туристичка сезона, општина Гевгелија заедно со ЈПКП "Комуналец" организираат акција за уредување на делови од планинското одморалиште Смрдлива вода. Покрај уредувањето на централниот дел од одморалиштето, каде што беа поставени клупи и детски играчки, формирана е посебна екипа за одржување на комуналната хигиена.
Покрај редовното собирање и отпремување на комуналниот отпад, ќе бидат превземени повеќе акции за уредување на одделни јавни површини, санација на јавните санитарни јазли, како и другите јавни објекти. Заради отстранување на одделни појави, кои ја загрозуваат средината во ова планинско одморалиште, мобилизирани се инспекциските служби, кои уште во текот на оваа недела ќе започнат си позачестени инспекциски контроли.

ПОСЕТА НА БЕЛГИСКИОТ АМБАСАДОР

Амбасадорот на Белгија, господинот Филип Беке, со седиште во Софија, кој е ополномоштен амбасадор и за РМ, престојуваше во посета на општина Гевгелија. Притоа, белгискиот амбасадор се сретна со градоначалникот на општината Драги Делев, а имаше средба и со претставници на бизнис заедницата од општината. Белгискиот амбасадор на средбата со градоначалникот на општина Гевгелија, беше запознаен со развојот на општината, посебно локалниот економски развој. Пред се, проектите кои се во фаза на реализација, а кои значително можат да придонесат за заживување на инвестиционата активност и создавање на услови за отворање на нови работни места. Потоа, амбасадорот Беке ја посети винаријата "Јостела", каде што имаше средба со преработувачите на овошје и зеленчук од општината и други стопанственици. Средбата беше збогатена и со презентација на преаботките од зеленчук и овошје од гевгелиските конзервни фабрики, како и вино, при што амбасадорот Филип Беке ја изрази својата подготвеност за воспоставување на потесна соработка меѓу гевгелиските фирми со белгиските компании. Пред се, за остварување на пласман на овие, како што самиот забележа, толку вкусни и квалитетни производи. Инаку, белгискиот амбасадор при престојот во Гевгелија ги посети и оранжериите на "Баџо" ДООЕЛ Гевгелија, кај термалните извори кај Смоквица.